Kryeministri Edi Rama ka bërë një tjetër reagim për zjarret që kanë prekur vendin ku disa zona janë shkrumbuar totalisht dhe bilanci është tragjik.
Rama ka postuar një foto të një avionit ‘Canadair’, i cili vjen nga shtetet fqinje, pasi Shqipëria nuk zotëron një të tillë.
Më tej ai sulmon kritikët duke shkruajtur ‘lehaqeniet që vazhdojnë avazin e tyre të krehjes para pasqyrave mediatike’.
Ndërsa po ashtu kryeministri tenton që situatën e zjarreve ta cilësojë si problem rajonal, pasi sipas tij i gjithë mesdheu po përballet me flakët.
“Mirëmëngjes dhe me një tjetër ditë gatishmërie të lartë e përpjekjesh të përbashkëta, përballë një situate të përmirësuar falë mundimesh e sakrificash të admirueshme por me rreziqe e të papritura në çdo çast; me neveri për lehaqeniet që vazhdojnë avazin e tyre të krehjes para pasqyrave mediatike, teksa në tërë Europën Jugore digjen në flakë mijëra vatra zjarri nga Spanja e deri në Turqi, ju uroj një ditë sa më të qetë të gjithëve”, ka shkruar kryeministri.
