Pas disa orësh seancë, Dhoma Civile e Gjykatës së Tiranës ka pranuar pjesërisht kërkesën e “Focus Meida Group”, në lidhje me fikjen e sinjalit të transmetimit të televizionit News24, rrethimin e godinës dhe ndërhyrjen e Policisë dhe Ushtrisë në sendet personale dhe profesionale të gazetarëve.
Më konkretisht, togat e zeza kanë vendosur që “Panorama Group” sh.a, që përfshin gazetën dhe televizionin Panorama, t’i rikthehet menjëherë godina dhe gazetarët të ushtrojnë veprimtarinë e tyre.
Ky vendim është marrë për shkak se, ndryshe nga godina e televizionit News24, godina ku ndodhej Panorama Group, kishte një kontratë qiraje më afatgjate me Qeverinë, e cila ende nuk kishte përfunduar.
Ndalimi i gazetarëve për t’u futur në redaksi është konsideruar si e paligjshme nga ana e togave të zeza.
Në vendim, thuhet se ambientet e Panoramës do të shfrytëzohen nga “Focus Media Group” dhe urdhërohet që kompania “KAYO” të lirojë menjëherë ambientet.
Po ashtu Gjykata ka urdhëruar që brenda 48 orëve, gazetarëve t’u lejohet aksesi në ambientet e punës së tyre për të marrë sendet personale, si dhe t’u kthehen të gjitha sendet, që një ditë më parë u morën me kamionë ushtrie në mënyrë të paligjshme nga kompania “KAYO”, e drejtuar nga Ardi Veliu. Gjithashtu është urdhëruar edhe inventarizimi i materialeve.
Por ndërkohë, shoqëria “KAYO”, në një reagim të mëparshëm, bëri me dij se materialet e gjetura brenda ambienteve, pas inventarizimit ishin dërguan pranë Rezervave të Shtetit, me adresë Rruga Bajram Tusha, pranë ish Gjykatës së Apelit, Shkozet, Durrës dhe u kërkohej punonjësve të News24 që të shkonin t’i merrnin aty.
Gjithashtu në vendimin e gjyqtares Alma Kodraliu, urdhërohet edhe largimi i bazës ushtarake, e cila kanë qenë një nga kërkesat bazë të gazetarëve në seancën gjyqësore të kësaj të marte.
Kujtojmë se mëngjesin e të shtunës, godinat tek ish-uzina e Autotraktorëve në Shkozë ku ushtronte veprimatrinë grupit mediatik “Focus Media Group”, u rrethua nga forca të shumta Policie dhe gazetarët e punonjësit e tjerë nuk u lejuan të futeshin në redaksi.
Gjithashtu, godinës iu ndërpre energjia elektrike dhe iu hoq sinjali televizionit News 24, i cili prej katër ditësh vijon të jetë pa sinjal dhe gazetarët ndodhen në rrugë.
Sipas autoriteteve, për njërën prej godinave në ish-uzinën e Autotraktorëve në Shkozë është ndërprerë kontrata e qirasë që prej vitit 2022 dhe Focus Media Group i ka humbur gjyqet, ndërsa për godinën ku ndodhej aktualisht redaksia, Ministria e Ekonomisë pretendoi se Focus Media Group kishte detyrime qiraje të papaguara.
Qeveria miratoi më 12 mars 2025 një vendim që i kalonte shoqërisë shtetërore “KAYO” pronësinë e godinave të ish-Uzinës së Autotraktorëve, ku do të ushtrohej veprimtaria e prodhimit dhe tregtimit të armëve. Kompania “KAYO” është themeluar në vitin 2024 dhe në krye të saj, Edi Rama ka vendosur ish-drejtorin e Përgjithshëm të Policisë së Shtetit, Ardi Veliun.
Ndërhyrja e dhunshme me Polici dhe pa respektuar procedurën e rregullt ligjore tek godinat e grupit mediatik “Focus Meida Group”, është dënuar nga organizatat europiane dhe shqiptare të lirisë së medias, të cilat e kanë konsideruat si një sulm ndaj medias, fjalës së lirë dhe lirisë së shtypit.
