Një krim tronditës ka tronditur qytetin Gemona del Friuli në Italinë veriore, ku një nënë italiane ka pranuar se ka vrarë dhe copëtuar djalin e saj 35-vjeçar, me ndihmën e nuses së tij, për ta “mbrojtur” atë nga dhuna e dyshuar në familje.
Lorena Venier, 61 vjeçe, infermiere me profesion, rrëfeu para gjykatës se kishte planifikuar për muaj të tërë vrasjen e të birit, Alessandro Venier, në bashkëpunim me nusen e tij kolumbiane, Mailyn Castro Monsalvo, 30 vjeçe. Ajo tha se kishte ndërmarrë këtë akt për ta mbrojtur nusen dhe mbesën e saj të mitur nga abuzimi i vazhdueshëm i të ndjerit.
Trupi i Alessandros u gjet i copëtuar në bodrumin e banesës familjare, ku ai jetonte me gruan dhe vajzën 6-muajshe. Sipas dëshmisë së Lorenës, ata e kishin droguar me qetësues dhe insulinë, por ai kishte mbetur ende gjallë, ndaj më pas ishte mbytur me jastëk dhe lidhëse këpucësh.
“E copëtova trupin me një sharrë hekuri dhe përdora çarçafë për të ndalur gjakun. Gjithçka ishte pastruar me kujdes”, tha ajo para gjykatës. Ajo shtoi se Castro kishte marrë pjesë vetëm në zhvendosjen e trupit pas vrasjes.
Sipas raportimeve, nëna kishte frikë se djali do ta çonte nusen dhe vajzën në Kolumbi, ku ai kishte kërcënuar ta vriste gruan në një lumë, duke e konsideruar vendimin për vrasje si të vetmen mënyrë për të parandaluar tragjedinë.
Hetimet vazhdojnë, ndërsa të dyja gratë ndodhen në paraburgim dhe pritet të përballen me akuza të rënda për vrasje të paramenduar dhe shkatërrim të trupit.
