Presidenti Volodymyr Zelensky deklaroi se Ukraina nuk mund të shkelë Kushtetutën e saj për çështjet territoriale, duke theksuar se “ukrainasit nuk do t’ua dorëzojnë tokën pushtuesve”.
Duke komentuar vendimin e presidentit amerikan, Donald Trump, për t’u takuar me presidentin rus, Vladimir Putin, në Alaskë më 15 gusht, Zelensky tha se Ukraina është e gatshme për zgjidhje konkrete që mund të sjellin paqe.
Megjithatë, ai paralajmëroi se çdo zgjidhje që nuk përfshin Kievin “do të ishte një zgjidhje kundër paqes”.
Kujtojmë se Donald Trump sinjalizoi një ditë më parë se Ukraina mund të duhet të dorëzojë disa territore për t’i dhënë fund luftës.
“Po flasim për territore mbi të cilat është luftuar për tre vjet e gjysmë, shumë rusë kanë vdekur. Shumë ukrainas kanë vdekur. Është shumë e ndërlikuar. Do të marrim diçka mbrapsht, diçka do të shkëmbehet”, tha Trump.
