Gjykata e Lartë e Brazilit ka urdhëruar vendosjen në “arrest shtëpie” të ish-presidentit të djathtë Jair Bolsonaro, i cili është duke u gjykuar për akuza mbi organizimin e një grushti shteti, të cilat ai i mohon.
Vendimi është marrë nga gjyqtari Alexandre de Moraes, i cili është përgjegjës për hetimet ndaj Bolsonaros. Sipas tij, masa u mor për shkak se ish-presidenti nuk kishte respektuar urdhrat kufizues që i ishin vendosur muajin e kaluar.
Avokatët e Bolsonaros kanë reaguar ndaj vendimit, duke e mohuar çdo shkelje të urdhrave dhe kanë deklaruar se do të apelojnë vendimin, sipas agjencisë Reuters.
Në një deklaratë zyrtare në rrjetin X, Departamenti Amerikan i Shtetit dënoi vendimin e gjykatës braziliane, duke shtuar se do të mbajë përgjegjës të gjithë ata që ndihmojnë ose mbështesin sjellje të sanksionuara.
Ish-presidenti amerikan Donald Trump e ka përdorur këtë proces gjyqësor, të cilin ai e cilëson si një “gjueti shtrigash”, për të justifikuar vendosjen e tarifave prej 50% ndaj disa mallrave braziliane, ndonëse SHBA ka një suficit tregtar me Brazilin.
Gjykatësi Moraes, i cili vetë është subjekt i sanksioneve nga SHBA, tha se Bolsonaro kishte përdorur rrjetet sociale të aleatëve të tij, përfshirë djemtë, për të shpërndarë mesazhe që nxisnin sulme ndaj Gjykatës së Lartë dhe ndërhyrje të huaja në sistemin gjyqësor brazilian.
