Trupa gjyqësore ka pushuar hetimet ndaj kryeministres italiane Giorgia Meloni, e cila ishte vënë nën hetim pas lirimit të një oficeri policie nga Libia, i cili kërkohej nga Gjykata Penale Ndërkombëtare (GJPN).
Osama Elmasry Njeem u lirua në janar dhe u riatdhesua me një avion shtetëror italian, vetëm pak ditë pasi ishte arrestuar në qytetin verior të Torinos, në bazë të një urdhër-arresti të Gjykatës Ndërkombëtare Penale për krime të dyshuara kundër njerëzimit, përfshirë vrasje, tortura dhe përdhunim.
“Gjykata ka pushuar çështjen vetëm ndaj meje,” shkroi Meloni në rrjetin social X. Ajo ishte nën hetim për ndihmë dhe favorizim të një krimi dhe shpërdorim të fondeve publike.
Meloni shtoi se, sipas dokumenteve që ka marrë, prokuroria do të vazhdojë ndjekjen penale ndaj ministrit të Brendshëm, Matteo Piantedosi, ministrit të Drejtësisë Carlo Nordio dhe nënsekretarit të Kryeministrisë Alfredo Mantovano, të cilët ishin vënë nën hetim së bashku me të.
“Unë këmbëngul se kjo qeveri vepron në mënyrë të bashkërenduar nën drejtimin tim: çdo vendim, sidomos një kaq i rëndësishëm, merret në mënyrë të përbashkët. Prandaj është absurde të kërkosh që Piantedosi, Nordio dhe Mantovano të gjykohen, por jo unë,” shkroi Meloni, citon Reuters.
GJPN ka qenë duke hetuar krime të rënda të dyshuara në Libi që nga lufta civile e vitit 2011, pas një referimi nga Këshilli i Sigurimit i OKB-së.
Ministri i Drejtësisë Nordio i tha parlamentit në shkurt se Italia nuk kishte zgjidhje tjetër përveç lirimit të Elmasry-t, për shkak të gabimeve dhe pasaktësive në urdhër-arrestin ndërkombëtar.
