Kompania lobuese e kontraktuar nga PD, “Continental Strategy” i ka kërkuar zyrtarisht Departamentit Amerikan të Shtetit heqjen e “non gratës” për Sali Berishën.
Në dokumentin që mban datën 22 korrik argumentohet se vendimi për të përfshirë Berishën nën Sekcionin 7031(c), i cili përdoret për të ndëshkuar zyrtarët e huaj të përfshirë në korrupsion ose shkelje të të drejtave të njeriut, ka qenë politik dhe pa prova të mjaftueshme.
Sipas raportit, “ky emërim ka dëmtuar besueshmërinë e SHBA-së në Ballkan dhe ka kontribuar në përkeqësimin e situatës në Shqipëri, të cilën kritikët e përshkruajnë si “narkoshtet””.
Në dokument ndër të tjera thuhet se “Berisha nuk është më një figurë politike aktive dhe heqja e këtij emërimi do të ndihmonte në ripërtëritjen e neutralitetit amerikan dhe interesave strategjike në rajon”.
Në të njëjtën kohë, raporti hedh dritë mbi zgjerimin dramatik të përdorimit të seksionit 7031(c) gjatë administratës Biden, e cila ka bërë mbi 300 emërime në katër vitet e fundit, kryesisht kundër zyrtarëve të qeverive që bashkëpunojnë me SHBA-në, ndërsa kritikohet për shmangien e regjimeve më të majta që gjithashtu përballen me akuza për korrupsion.
Kjo çështje ka nxitur debate në Uashington, ku disa senatorë republikanë kanë akuzuar administratën për përdorim politik të këtij mekanizmi, duke favorizuar kundërshtarët politikë dhe duke minuar besueshmërinë e masave anti-korrupsion të SHBA-së.
