Klevis Hoxhosmani është një nga gjashtë të arrestuarit nga SPAK në operacionin kundër një rrjeti të madh të trafikut të kokainës nga Amerika Latine drejt Evropës dhe Britanisë së Madhe.
Ai rezulton të ketë qenë më herët i përfshirë në disa biznese në Angli, përfshirë lavazhin “Crystal Hand Carëash Of Bournemouth Limited” dhe kompaninë “Barrack Road Tyres Limited”. Në vitin 2023, themeloi edhe kompaninë “Opa Coffee Limited”, e cila ndërroi adresën në mars 2025.
Në Britani nuk figuron me precedentë penalë të rëndë, por në vitin 2014 është dënuar për një incident dhune dhe dëmtim prone. Emri i Hoxhosmanit ka tërhequr vëmendje edhe për shkak të lidhjes së tij të përfolur me Kejda Ajazin, vajzën e ish-deputetes dhe ish-ministres Majlinda Bregu.
Kejda Ajazi njihet për jetën luksoze me paratë e Haxhiosmanit dhe udhëtimeve nga Dubai në Monaco, ku Ajazi është parë shpesh në rrjete sociale me automjete luksoze dhe veshje të markave të njohura ndërkombëtare. Këto detaje janë komentuar gjerësisht, veçanërisht pas arrestimit të partnerit të saj.
SPAK, në njoftimin zyrtar, nuk ka dhënë detaje të plota për rolin konkret të Hoxhosmanit brenda organizatës kriminale, por nga bisedat e përgjuara në aplikacionet e komunikimit të enkriptuar si Sky/ECC, dyshohet se ai ka qenë pjesë aktive e asaj që njihet si “Banda e Durrësit”, e drejtuar fillimisht nga Lulzim Berisha dhe më pas nga Plarent Dervishi.
Një sasi prej 250 kg kokainë u sekuestrua në prill 2023, e destinuar për në Britaninë e Madhe, përmes Francës.
Hetimet disa mujore të SPAK në bashkëpunim me autoritetet ligjzbatuese ndërkombëtare çuan në goditjen e një rrjeti të madh kriminal, të përbërë nga 16 persona. Sipas SPAK, grupit i janë sekuestruar mbi 6 ton kokainë me një vlerë tregu që kap shifrën e 411 milionë eurove. Organizata funksiononte me struktura të qarta dhe linja të përhapura në disa shtete të Evropës.
Në total, janë lëshuar 7 urdhër-arreste, nga të cilët 6 janë ekzekutuar. Arrestimet janë kryer në Palasë, Elbasan dhe Tiranë, ndërsa hetimet vazhdojnë për të përcaktuar rolet konkrete të secilit anëtar të rrjetit.
