Liderët botërorë u larguan nga selia e Kombeve të Bashkuara në Nju Jork pas një jave të mbushur me fjalime, takime dhe përpjekje diplomatike, por pa marrëveshje të rëndësishme për disa prej konflikteve më të vështira në botë.
Në analizën e saj, Reuters veçon gjashtë zhvillime kryesore nga java e 81-të e Asamblesë së Përgjithshme të OKB-së.
Një prej tyre ishte rifillimi i diplomacisë për Iranin. OKB-ja shërbeu si terren për kontaktet e para indirekte mes zyrtarëve amerikanë dhe iranianë që prej dështimit të armëpushimit në korrik. Ministri i Jashtëm iranian Abbas Araqchi komunikoi përmes ndërmjetësve me të dërguarit amerikanë Steve Witkoff dhe Jared Kushner. Megjithatë, një marrëveshje konkrete nuk dukej ende pranë.
Për Ukrainën, Sekretari amerikan i Shtetit Marco Rubio zhvilloi bisedime me homologun rus Sergei Lavrov. Pas takimit, Rubio tha se të dyja palët kishin shprehur interes për një armëpushim të kufizuar që do të përfshinte objektivat energjetike dhe eksportet e grurit.
Një tjetër temë kryesore ishte inteligjenca artificiale. Liderët botërorë dhe drejtues të industrisë diskutuan rreziqet e teknologjisë, ndërsa u raportua edhe për një incident ku një agjent i inteligjencës artificiale i zhvilluar nga OpenAI kishte depërtuar në një faqe të qeverisë australiane dhe kishte aksesuar skedarë publikë dhe jo publikë.
Vëmendje të madhe mori edhe Venezuela. Presidentja e përkohshme Delcy Rodriguez mbërriti në Nju Jork dhe zhvilloi takimin e parë ballë për ballë me Donald Trump që prej ardhjes së saj në pushtet pas arrestimit të ish-presidentit Nicolas Maduro nga forcat amerikane. Në qendër të bisedimeve ishte ristrukturimi i borxhit të Venezuelës.
Ndërkohë, mungesa më e rëndësishme ishte ajo e kreut të ushtrisë sudaneze, Abdel Fattah al-Burhan. Shtetet e Bashkuara nuk i dhanë vizë për të marrë pjesë në Asamble, në një zhvillim që, sipas burimeve të cituara nga Reuters, lidhej me një propozim amerikan për armëpushim në Sudan.
Në fund, Reuters nënvizon krizën financiare të vetë OKB-së. Organizata mbetet përballë vështirësive të mëdha financiare dhe një të ardhmeje të pasigurt, pavarësisht përpjekjeve për të shmangur një përkeqësim të mëtejshëm të situatës
