Ministria e Drejtësisë së Kosovës ka reaguar zyrtarisht lidhur me hyrjen e ish-bashkëshortit të Drenusha Latifit në edicionin e tretë të “BBVK”, vendim që ngjalli mjaft polemika dhe reagime kundrejt produksionit të këtij formati.
Atilla Kardeshi është akuzuar publikisht, por edhe në rrugë ligjore nga banorja e “BBVK”, Drenusha, për dhunë fizike. Këto pretendime, sipas reagimit zyrtar, janë të provuara, ndaj autoritetet e Kosovës kanë kërkuar largimin e menjëhershëm të ish-bashkëshortit të Drenushës nga ky format.
“Situata me të cilin potencialisht do të përballet znj. Latifi, në praninë e ish-bashkëshortit “dhunues” paraqet rast të veçantë dhe në emër të prioritizimit të mbrojtjes së dinjitetit të një të mbijetuare të dhunës në familje – viktimë, e cila është shprehur publikisht për kërcënimet nga ish-bashkëshorti, tashmë të provuara, bëjmë thirrje menaxhmentit të Klan Kosova të tërheqë z. Atilla Kardesh nga formati televiziv, për të parandaluar çfarëdo lloj forme të presionit, ose dhunës psikologjike, që rëndon pozicionin dhe krijon kushte për ripërjetimin e dhunës nga e mbijetuara znj. Latifi.”, thuhet në njoftim.
Ndonëse i pyetur nga banorët e tjerë, Atilla refuzoi të ketë ushtruar dhunë, reagimi zyrtar shpreh të kundërtën. Dhuna është provuar dhe banorja e “BBVK” është pajisur me urdhër mbrojtje në datën 10 shkurt të këtij vitit.
“Koordinatorja Nacionale dhe përfaqësuesit e grupit ndërministror me qëllim të zbatimit “të masave për të promovuar dhe mbrojtur të drejtën për çdokënd, veçanërisht gratë, për të jetuar pa dhunë në sferën publike, si dhe në atë private”, tërheqin vëmendjen e televizionit të lartëcekur, në rastin e znj. Drenusha Latifi pjesëmarrëse e emisionit ‘’Big Brother’’, e cila është e mbijetuar e dhunës në familje dhe e cila ka poseduar Urdhër Mbrojtjeje (UM) prej ish-bashkëshortit të saj, z. Atilla Kardesh, i cili ishte aktiv nga data 10/02/2024 për periudhën kohore në afat prej 6 muajsh”, thuhet më tej.
Po ashtu, në reagim theksohet se do të ndërmerren masa edhe ndaj televizionit “Klan Kosova”, si dhe ndaj formatit “Big Brother VIP Kosova”, për shkak se situata e krijuar ka ekspozuar Drenushën ndaj një forme tjetër dhune, që është ajo psikologjike publikisht.
“Vendosja e znj. Latifi nën presion psikologjik përballë ish-bashkëshortit, i cili është cilësuar si dhunues me vetë lëshimin e UM, është formë e dhunës psikologjike, e cila e vendos znj. Latifi në pozitë të cenueshme psikologjike, dhe paraqet mundësi të riviktimizimit por tani në situatë të presionit psikologjik publik.”, vazhdon njoftimi.
Gjithashtu, në njoftim theksohet se edhe fëmijët e dy ish-bashkëshortëve janë viktimë e këtij vendimi të produksionit.
Ky reagim i ashpër vjen pas një vale të fortë reagimi në rrjet, ku komentues të ndryshëm kanë kritikuar produksionin e “Big Brother VIP Kosova”, ndërsa shumica kanë kërkuar të ndërmerren masa drastike, deri në heqjen e patentës nga “Endemol”.
