Detaje të reja kanë dalë në dritë nga krimi i rëndë në fshatin Frashër të Fierit, ku dyshohet se 26-vjeçarja Ermalinda Rama vrau të atin, Anesti Rama, në bashkëpunim me 55-vjeçarin Çlirim Dogani, shofer autobusi dhe banor i fshatit Arapaj të Roskovecit.
Hetimet e deritanishme tregojnë se mes Ermalindës dhe Çlirimit kishte një lidhje intime, pavarësisht se ai ishte i martuar dhe baba i fëmijëve të rritur. Dyshohet se kundërshtimi i të atit ndaj kësaj marrëdhënieje ka qenë arsyeja që e çoi vajzën në vendimin fatal për ta eliminuar.
Dogani, i arrestuar më 26 korrik, akuzohet se ndihmoi Ermalindën në kryerjen e vrasjes, duke e mbytur 56-vjeçarin me tel. Ndërkohë, në pranga ka rënë edhe bashkëshortja e viktimës, Valbona Rama, e cila dyshohet se ka ndihmuar të bijën në pastrimin e trupit dhe zhdukjen e provave.
Çlirim Dogani ka mohuar përfshirjen, duke deklaruar se ndodhej në fshatin e tij në kohën e ngjarjes, por provat dhe dëshmitë që po hetohen mund të hedhin dritë mbi rolin e tij real në këtë vrasje që ka tronditur opinionin publik.
