Një 20-vjeçar shqiptar është arrestuar nga karabinierët në qytetin Terni të Italisë, pasi u kap në flagrancë duke vjedhur në ambientet e një shkolle fillore në zonën Cianferini, në rrugën “Narni”.
Sipas mediave italiane, alarmi u dha nga Qendra e Operacioneve e Komandës Provinciale, e cila njoftoi menjëherë patrullat në zonë. Forcat e rendit konstatuan të riun teksa largohej me biçikletë dhe e ndoqën deri në fshatin Campomaggio, ku ai tentoi të arratisej në këmbë, por u kap dhe u arrestua.
Hetimet zbuluan se i riu kishte prerë telat e gardhit për të hyrë në territorin e shkollës dhe kishte shkëputur disa metra tubacione bakri nga rrjeti i kanalizimeve të ujërave të zeza. Në total, ai kishte marrë rreth 12 kilogramë bakër, që dyshohet se do t’i shiste për skrap.
Në çantën e tij të shpinës, policia gjeti edhe mjetet e përdorura për vjedhjen, përfshirë pinca dhe çelësa. I dyshuari rezultoi me precedentë të mëparshëm penalë.
Pas arrestimit, shqiptari u akuzua për vjedhje të rëndë dhe u dërgua në arrest shtëpiak me vendim të gjykatës. Materialet e vjedhura u sekuestruan si prova dhe iu rikthyen shkollës. Gjykimi ndaj tij do të zhvillohet me procedurë të shkurtuar.
