Në Shqipëri, edhe pse burrat zotërojnë më shumë telefona celularë se gratë, janë gratë ato që përdorin më shpesh smartphone. Kjo është një nga gjetjet kryesore të raportit të fundit Global Findex 2025, publikuar nga Banka Botërore, që analizon përfshirjen financiare në 120 shtete të botës, përfshirë edhe Shqipërinë.
Sipas të dhënave nga 1,000 intervista në vend, 94% e burrave dhe 92% e grave zotërojnë një telefon celular. Megjithatë, ndarja sipas llojit të telefonit tregon një prirje interesante: 81% e grave përdorin smartphone, krahasuar me 77% të burrave. Përkundrazi, 17% e burrave përdorin telefona bazikë, ndërsa kjo përqindje është vetëm 11% tek gratë. Kjo sugjeron se, edhe pse në përqindje të lehtë më pak gra zotërojnë një telefon, ato kanë më shumë gjasa të përdorin pajisje më të avancuara.
Raporti thekson se telefonat celularë dhe interneti janë kthyer në mjete të domosdoshme në jetën e përditshme globale, duke ndikuar në komunikim, punësim, edukim dhe përfshirje financiare. Në vitin 2024, 86% e të rriturve në mbarë botën zotëronin një celular.
Banka Botërore vëren se rritja e përdorimit të teknologjive dixhitale po ndihmon në uljen e varfërisë dhe krijimin e mundësive të reja ekonomike, veçanërisht në vendet me të ardhura të ulëta dhe të mesme.
