Kreu i qeverisë, Edi Rama, përmes një postimi në Facebook ka bërë me dije se vetëm në Tiranë, deri nesër do të jenë çliruar rreth 20 mijë metra katrorë hapësira publike, në kuadër të aksionit kundër zaptimit të trotuareve dhe hapësirave të përbashkëta.
Ai thekson se puna nuk do të ndalet as në kryeqytet, as në qytetet e tjera, e as në zonat bregdetare apo të mbrojtura.
Ndërkohë, po punohet paralelisht për projektet e “Rilindjes Urbane 2.0”, me kontributin e arkitektëve vendas dhe të huaj.
Së shpejti, bën me dije kryeministri, të prezantohet plani i ri për vendosjen e tavolinave jashtë, ku 75% e hapësirës do t’i mbetet këmbësorëve dhe vetëm 25% njësive të shërbimit, pa lejuar ndërtim strukturash mbi trotuare pa projekte të miratuara.
Edi Rama: Sipas planit të punës vetëm në Tiranë arrin deri nesër në rreth 20 mijë metra katrorë sipërfaqja e hapësirave publike të çliruara, ndërkohë që puna nuk do të ndalet më as në kryeqytet, as në qytetet e tjera ku ka marrë kot ky fenomen dhe as në bregdet e në zonat e mbrojtura jo e jo…
Ndërkohë po punohet me projektet e Rilindjes Urbane 2.0 për të cilën janë angazhuar shumë arkitektë të huaj e vendas.
Ndërsa për vendosjen e tavolinave jashtë, së shpejti do t’u jepet të gjithëve plani i ri, me formulën bazë 75% të hapësirës këmbësorët 25% njësia e shërbimit. Dhe nuk do të lejohet asnjë lloj strukture e ndërtuar në trotuare, përveçse në rastet e hapësirave të bollshme e vetëm atje ku ka një projekt të mirëfilltë urbanistik.
