Ilir Meta do të vijojë të qëndrojë në qeli. Apeli i Posaçëm rrëzoi sot kërkesën e ish-Presidentit të Republikës për ndryshim të masës së sigurisë.
Në një prononcim për mediat pas dhënies së vendimit, avokati i Metës, Kujtim Cakrani tha se kreu i PL-së po mbahet në paraburgim në kushte jo normale.
Kujtim Cakrani: Të dy prokurorët, zoti Kraja me kolegun e vet nuk dhanë asnjë shpjegim. Ata nuk kishin një aryse që Presidenti duhet të qëndrojë në paraburgim. Presidenti i Republikës po mbahet në kushtet e paraburgimit, por jo në kushte normale, po mbahet në kushtet e një persekutimi. I janë mohuar të drejtat. Presidenti nuk ka më besim te Gjykatat në këtë Republikë. Gjykata nuk u ngrit dot në lartësinë e duhur sot dhe të merrte një vendim ndryshe nga ai i Shkallës së Parë.
Kreu i Partisë së Lirisë, i cili ndodhet në qeli që nga tetori i vitit të kaluar, kërkoi në Apelin e Posaçëm zbutjen e masës së sigurisë “arrest në burg”, me pretendimin se është i hapur për hetimet e SPAK.
Por nga ana tjetër ky Organ thotë se Meta mund të ndikojë në provat që ata po grumbullojnë, ndaj nuk duhet liruar nga qelia. SPAK ka zgjatur hetimet për ish-Presidentin e vendit dhe ish- bashkëshorten e tij, Monika Kryemadhi deri në tetor të këtij viti.
Ish-Presidenti akuzohet se ka kryer korrupsion, pastrim parash e fshehje të origjinës së tyre në lidhje me dosjet Cez-Dia, lobimin në Shtetet e Bashkuara të Amerikës dhe për shpenzime familjare.
Ndërkohë Monika Kryemadhi është lënë në masën “detyrim paraqitje”.
