Kreu i Nismës “Thurje” Endri Shabani nuk ka vonuar me reagimin e tij në rrjetet sociale pas akuzave nga Adriatik Lapaj për padrejtësi nga ana e tij dhe e dajës së tij, Zeqir Kordhonit lidhur me mandatin e deputetit. Shabani ka zgjedhur të thumbojë përmes vargjeve të Kico Spirit duke shkruar:
Mora pushkën dola malit,
Të luftoja për atdhe,
Ku ta dija unë i varfri,
Se armiku ishim ne.
Mora pushkën dola malit
Të luftoja në furtunë;
Ku ta dija unë i ngrati
Se armiku isha unë.
Kreu i Lëvizjes “Shqipëria Bëhet”, Adriatik Lapaj ka reaguar më parë me anë të rrjeteve sociale pas letrës së kandidatit Zeqir Kordhoni drejtuar Komisionit Qendror të Zgejdhjeve një ditë më parë, ku kërkon që të ushtrojë mandatin e deputetit në rast se shpallet fitues.Lapaj thotë se është angazhuar gjithë “këneta” që ai të mos shkojë në Kuvend. Ai thotë se nuk pranon shantazh e as nuk shitet. Sipas tij, Zeqiri (daja i Endrit) dhe nipi i tij Endri Shabani të cilit shprehet se i shtru dorën e bashkimit, nuk do të marrin asnjë mandat, por maksimumi thotë se do ta ndalojnë atë të shkoj në Parlament.
Fituese e mandatit të Nismës Shqipëria Bëhet në Tiranë aktualisht është Ana Dajko, ndërsa më i votuari nga lista e hapur është Adriatik Lapaj. Që ai të hyjë në parlament, duhet që Ana Dajko dhe 11 të tjerët e listës së mbyllur të refuzojnë mandatin.
Dy partitë “Shqipëria Bëhet” dhe “Nisma Thurje” kishin rënë dakord që deputet do të bëhej kandidat ai që merrte më shumë vota nga lista e hapur. Ndërsa ata që ishin në listën e mbyllur do të jepnin dorëheqjen.
Por tani duke se kjo marrëveshje mund të mos zbatohet, pasi kandidati i Nismës Thurje në listën e mbyllur në Tiranë, Zeqir Kordhoni vijon këmbënguljen.
