Në një kohë kur aftësitë digjitale janë thelbësore për përfshirjen në tregun e punës dhe jetën sociale moderne, Shqipëria renditet ndër vendet me nivelin më të ulët të përgatitjes digjitale në Europë. Sipas Eurostat, vetëm 51% e të rinjve shqiptarë (16–29 vjeç) zotërojnë aftësi digjitale bazë, shumë poshtë mesatares së BE-së prej 71%.
Nuk ka dallime gjinore në Shqipëri, si djemtë, ashtu edhe vajzat janë në të njëjtin nivel (51%). Në kontrast, në shumicën e vendeve të BE-së, vajzat e reja kanë kaluar djemtë për nga zotërimi i aftësive digjitale. Në vitin 2023, 73% e vajzave në BE raportuan aftësi digjitale bazë, krahasuar me 69% të djemve, me diferencën më të madhe në Kroaci (94% vajza ndaj 80% djem).
Në pesë vende të BE-së, Gjermani, Maltë, Rumani, Estoni dhe Sllovaki, djemtë kanë pak më shumë aftësi digjitale se vajzat.
Përdorimi i internetit
Përkundër aftësive të ulëta digjitale, 99% e të rinjve shqiptarë përdorën internetin çdo ditë në vitin 2024, përqindje më e lartë se mesatarja e BE-së (97%). Por në nivel kombëtar, vetëm 83% e popullsisë së përgjithshme përdor internetin çdo ditë, duke krijuar një hendek prej 14 pikë përqindjeje midis brezave, më i thellë se mesatarja e BE-së (9 pikë).
Në vende të digjitalizuara si Irlanda dhe Holanda, ku 100% e të rinjve janë online, edhe popullsia e përgjithshme është pothuajse në të njëjtin nivel (98%), duke treguar një përfshirje më të gjerë në botën digjitale.
