Një debat i tensionuar është shënuar gjatë takimit mes kryeministrit Edi Rama dhe drejtuesve vendorë, ku në qendër të përplasjes ka qenë Kryetari i Bashkisë Konispol, Ergest Dule.
Sipas asaj që raporton ‘Sarandaweb’, Kryeministri Rama ka ripërsëritur kërkesën për dorëheqjen kolektive të drejtorëve të institucioneve vartëse, si pjesë e një procesi të gjerë për pastrimin e administratës nga paaftësia dhe ndikimet familjare.
Megjithatë, kryebashkiaku Dule ka refuzuar prerazi të zbatojë këtë kërkesë, duke deklaruar: “Nuk i largoj drejtorët. Janë të rinj, të aftë dhe po japin rezultate shumë të mira.”
Ky qëndrim ka shkaktuar një reagim të fortë nga Kryeministri, i cili është shprehur: “Nëse nuk i shkarkon, atëherë jepe ti dorëheqjen!”
Pas deklaratës së Ramës, në sallë ka rënë heshtja, duke reflektuar tensionin dhe njëfarë përuljeje nga ana e pjesëmarrësve të tjerë.
Ky episod tregon se ende ka kryetarë bashkish që përpiqen të ruajnë autonominë në vendimmarrje dhe nuk janë të gatshëm të ndjekin çdo direktivë në mënyrë të verbër.
Deri në këto momente, z. Dule nuk ka dhënë ende një qëndrim zyrtar pas përplasjes me Kryeministrin.
