Kryeministri Edi Rama zhvilloi një takim me dyer të mbyllura me nënkryetarët e bashkisë Tiranë, drejtuesit politik të qarqeve, drejtorët e bashkisë Tiranë dhe të gjithë kandidatët e qarkut të kryeqytetit.
Burime bëjnë me dije se kryeministri është ndalur shumë shkurt në zgjedhjet e parakohshme në disa bashki të vendit.
Kreu i qeverisë ende nuk e ka vendosur “fatin” se çfarë do të ndodhë me bashkinë e Tiranës e cila prej 10 shkurtit ndodhet pa kryebashkiak, pas arrestimit të Erion Veliajt.
“Nuk i dihet nëse do kemi zgjedhje të parakohshme në Tiranë tani apo pas dy vitesh”, raportohet të ketë thënë Rama në mbledhje me dyer të mbyllura.
Gjithashtu, Rama u ka kërkuar drejtuesve politik së bashku me dy deputetë të ngrenë grupe pune për të rifreskuar burimet njerëzore në të gjitha bashkitë e vendit.
“Rama ka dhënë disa porosi në mbledhjen me deputetët e Tiranës, ku i ka thënë që duhet të hiqen licensat e noterëve që japin shërbime të e-albania kundrejt pagesës.
Gjithashtu Rama ka kërkuar që të rifreskohen stafet e bashkive, fillimisht për bashkitë që janë qendër qarku, por kjo gjë jo për bashkinë e Tiranës.
Ndërkohë, sa i përket zgjedhjeve të parakohshme në bashkinë e Tiranës mësohet se kryeministri ka thënë “nuk mbahet mendja tek zgjedhjet e parakohshme, mos u ndikoni tek zgjedhjet e parakohshme në Tiranë nëse do ketë apo jo”, raporton gazetarja Mola Luku./oranews
