Personi që shihni në foto është Arben Anamali, kapiteni i anijes turistike në Liqenin e Shkodrës, i cili humbi tragjikisht jetën ditën e djeshme ndërsa përpiqej të shpëtonte dy turistë që po rrezikonin të mbyteshin.
Ky akt heroik i kapitenit përfundoi në një tragjedi me një humbje të madhe për familjen, komunitetin dhe të gjithë ata që e njihnin. Arbeni ishte gjithmonë në shërbim të vizitorëve dhe turistëve, duke dhënë kontributin e tij pa hezitim, pavarësisht rreziqeve.
Në mëngjesin e sotëm, ndërsa forcat policore të FNSH-së, në bashkëpunim me policinë dhe punonjësit e Bashkisë së Shkodrës vijojnë kërkimet për gjetjen e trupit të kapitenit, shumë zyrtarë kanë reaguar për këtë humbje të rëndë.
Kryebashkiaku i Shkodrës, Benet Beci, shprehu trishtimin për ngjarjen dhe theksoi se strukturat do të qëndrojnë të angazhuara gjatë gjithë ditës për të siguruar gjetjen e trupit të kapitenit Anamali. “Strukturat do të jenë të angazhuara edhe gjatë ditës së sotme për të bërë të mundur gjetjen e trupit të Arbenit, kapitenit që sakrifikoi jetën për të shpëtuar turistët që po rrezikonin jetën e tyre. Fatkeqësisht, ky akt heroik u kthye në një tragjedi për të, familjen dhe për të gjithë ata që e njohën,” shkroi Beci.
