Në redaksinë e emisionit “Tak Fak” ka mbërritur një apel prekës nga znj. Miranda, e cila kërkon ndihmë për motrën e saj, Mimoza Sallaku, 59-vjeçe, e cila vuan nga probleme të rënda të shëndetit mendor dhe jeton e vetme në fshatin Seman të Fierit. Pasi ka humbur të gjithë familjarët që kujdeseshin për të, Mimoza është lënë në mëshirë të fatit, ndërsa e motra e saj thotë se nuk ka mundësi ta ndihmojë më për shkak të kushteve të saj shëndetësore dhe ekonomike.
Në një bisedë me gazetaren Anxhela Gjiriti ajo kërkon që motra të strehohet në një institucion të specializuar për të pasur kujdesin dhe sigurinë që meriton. Gjithashtu edhe komshia e 59-vjeçares ka deklaruar se e ka ndihmuar me ushqime dhe ilaçe kur ka pasur mundësi, por gjendja e saj është përkeqësuar.
Pjesë nga dialogu:
Miranda: Ju kam thirrur pasi kam motrën 59 vjeçe. Ajo jeton e vetme, pasi prindërit dhe vëllai që kujdeseshin për të kanë ndërruar jetë. Mimoza ka lindur me probleme të shëndetit mendor po që pas vdekjes se prindërve gjëndja e saj është përkeqësuar, dhe unë e kam të pamundur të kujdesem për të pasi edhe vetë jam e sëmurë.
Komshia: Jam kujdesur unë për Mimozën sa herë kam mundësi, po kjo nuk ka qënë kështu, tani është rënduar. Vi i jap për të ngrënë po dhe ilaçet se më vjen gjynah.
Miranda: Unë dua që motra të shkojë në një institucion ku të jetë e sigurtë sepse unë jetoj me ankth.
