Fabio, portieri legjendar i Fluminense, vazhdon të shkruajë histori. I lindur më 30 shtator 1980, ai është plot 27 vite më i madh se sensacioni i ri i futbollit botëror, Lamine Yamal (i lindur më 13 korrik 2007). Dhe në moshën 44-vjeçare, Fabio ka udhëhequr Fluminense drejt një gjysmëfinaleje historike në Kupën e Botës për Klube, duke e kthyer skuadrën nga Rio de Janeiro në surprizën e madhe të turneut.
Fluminense nuk është vetëm skuadra më e befasishme e kompeticionit, por edhe një nga më të fortat në mbrojtje. Skuadra e drejtuar nga Renato Gaúcho ka pësuar vetëm 3 gola gjatë turneut: një nga Marcos Leonardo në çerekfinale dhe dy të tjerë nga Ulsan.
Sekreti i suksesit? Një skuadër e organizuar mirë në fushë dhe, mbi të gjitha, përvoja që bën diferencën. Mbrojtja e Fluminense, e përbërë nga tre qendërmbrojtës dhe portieri Fabio, ka një moshë mesatare mbi 34 vjeç.
Në portë qëndron lojtari më i vjetër i turneut, Fabio, i cili ka grumbulluar 1390 ndeshje në karrierë. Ai ndodhet vetëm 22 ndeshje larg rekordit absolut të Peter Shilton si lojtari me më shumë prezenca në histori. Me fanellën e Cruzeiros, portieri në fjalë mban rekordin e klubit me 977 ndeshje të zhvilluara.
Kapiteni i tij, Thiago Silva, është lojtari i fushës më me përvojë i turneut, me 40 vite mbi supe. Performancat e tyre, të shoqëruara nga qëndrueshmëria e Ignácio dhe Freytes në mbrojtje, kanë qenë themelore për suksesin e Fluminense në këtë edicion të Kupës së Botës për Klube.
Kuriozisht, Fabio nuk ka arritur kurrë të luajë me përfaqësuesen e parë të Brazilit, edhe pse ka qenë pjesë e skuadrës që fitoi “Copa América” në vitin 2004, pa u aktivizuar në asnjë ndeshje. Ai numëron tituj si kampion i ligës me Cruzeiron, kampion bote U-17 në vitin 1997 dhe, së fundi, kampion i “Libertadores” në vitin 2023.
