Që prej pasdites së djeshme, zjarri në inceneratorin e Elbasanit vazhdon të jetë aktiv edhe gjatë ditës së sotme. Edhe pas më shumë se 10 orësh përpjekjesh intensive, vatra nuk është shuar plotësisht dhe flakët vijojnë të digjen në thellësi të masës së mbetjeve. Tymi i dendur ka mbuluar zonën përreth, duke ndotur ndjeshëm ajrin dhe duke rrezikuar banesat në afërsi.
Temperaturat e larta kanë ndikuar negativisht, duke përshpejtuar përhapjen e tymit dhe duke e bërë më të vështirë ndërhyrjen. Shkaqet e zjarrit mbeten ende të paqarta. Dyshohet se mund të jetë zjarrvënie e qëllimshme.
Për të përballuar situatën, janë angazhuar 15 mjete zjarrfikëse dhe mbi 100 efektivë nga të gjitha bashkitë e qarkut Elbasan, të ndihmuar edhe nga forcat e Kamzës, Tiranës dhe Beratit.
Megjithatë, ndërhyrja në landfill mbetet tepër sfiduese për shkak të përmasave të mëdha të mbetjeve dhe pranishmërisë së materialeve lehtësisht të djegshme.
