Një sipërfaqe e konsiderueshme toke publike në zonën e ish-‘Shkollës së Marinës’ në Vlorë, e cila ishte zaptuar në mënyrë të paligjshme dhe përdorej si parkim privat kundrejt pagesës, është liruar pas ndërhyrjes së policisë.
Për këtë rast, janë proceduar penalisht një qytetar 44-vjeçar me inicialet R. F. (M)., që prezantohej si pronar i tokës dhe drejtori i Policisë Bashkiake të Vlorës, Emiliano Ismaili, i dyshuar për shpërdorim detyre.
Sipas policisë, gjatë kontrollit në terren u konstatuan tabela dhe trarë elektrikë të vendosur në hapësirën publike, për qëllime përfitimi. Automjetet e parkuara aty u larguan me karrotrec.
Materialet për këtë rast janë referuar në Prokurori, ndërsa policia bën thirrje për denoncimin e rasteve të ngjashme të zaptimit të hapësirave publike.
