Një burrë 67-vjeçar me mbiemrin Won është akuzuar më 25 qershor për tentativë vrasjeje, zjarrvënie dhe shkelje të Ligjit për Sigurinë në Hekurudha, pasi më 31 maj ai dyshohet se ka shkaktuar një zjarr të qëllimshëm në një metro në Seul.
Sipas autoriteteve koreane, i dyshuari kishte derdhur një sasi të madhe benzine në dyshemenë e vagonit dhe më pas e kishte ndezur atë me një çakmak, duke shkaktuar një zjarr të madh që çliroi gazra toksikë dhe rrezikoi drejtpërdrejt jetën e rreth 160 udhëtarëve që ndodheshin në tren.
Sipas agjencisë Yonhap, gjashtë persona u plagosën, ndërsa 23 të tjerë, përfshirë edhe vetë autorin, u dërguan në spital për shkak të asfiksisë nga tymi. Dëmet materiale të shkaktuara përllogariten në mbi 300 milionë won (rreth 282 mijë dollarë).
Pamjet nga kamerat e sigurisë tregojnë momentin kur burri derdh lëndën djegëse dhe e ndez, ndërsa pasagjerët përpiqen të largohen në panik.
Prokuroria e përshkroi aktin si një formë terrorizmi, duke thënë: “Spërkatja me benzinë e një mjeti transporti publik dhe ndezja e saj, me praninë e shumë pasagjerëve, është një akt vrasës i barasvlershëm me terrorizëm”.
Sipas mediave lokale, motivi i zjarrvënies besohet të jetë hakmarrja pas një vendimi gjyqësor lidhur me divorcin e tij të fundit. Autori u arrestua menjëherë pas ngjarjes./ilirianews.al
