Policia e Tiranës ka zbardhur ngjarjen e ndodhur një ditë më parë në zonën e Institutit, ku disa persona u përplasën me njëri-tjetrin.
Policia njofton se në konflikt janë përfshirë shtatë persona.
Një prej tyre është arrestuar në flagrancë, dy po hetohen në gjendje të lirë, ndërsa katër të tjerë janë shpallur në kërkim.
Gjatë konfliktit u qëllua edhe me armë, fatmirëisht pa të lënduar.
Blutë njoftojnë se kanë arrestuar shtetasin Y. C., 30 vjeç, për veprën penale “Mbajtja pa leje dhe prodhimi i armëve, armëve shpërthyese dhe i municionit”, kanë referuar materialet në Prokurori ku nisi procedimi në gjendje të lirë për shtetasit M. M. dhe M. S., për veprat penale “Plagosje e lehtë me dashje” dhe “Kanosja” dhe kanë shpallur në kërkim shtetasit S. Rr., 22 vjeç dhe E. Rr., 25 vjeç (vëllëzër) R. D., 18 vjeç dhe V. H., 27 vjeç.
Nga veprimet hetimore dyshohet se gjatë një konflikti për motive të dobëta, shtetasit S. Rr. dhe E. Rr. kanë goditur me qytën e pistoletës shtetasit Y. C. dhe O. C. (vëllëzër) dhe më pas kanë qëlluar me armën e zjarrit në drejtim të tyre, pa i dëmtuar.
Vëllëzërit S. Rr. dhe E. Rr. dyshohet se janë ndihmuar nga shokë të tyre të identifikuar si R. D., V. H., M. M. dhe M. S., të cilët kanë goditur me grushte dhe me sende të forta shtetasin A. C., 38 vjeç, si dhe dyshohet se kanë kanosur me armë zjarri shtetasin A. H., 48 vjeç, të dy kushërinj të vëllëzërve Y. C. dhe O. C.
Policia po punon për kapjen e katër shtetasve të shpallur në kërkim.
