Provimi i dytë i maturës shtetërore, ai i Gjuhës Shqipe dhe Letërsisë, ka rezultuar sfidues për një numër jo të vogël maturantësh. Sipas të dhënave të publikuara nga Qendra e Shërbimeve Arsimore (QSHA), 365 maturantë nuk e kanë kaluar provimin, duke marrë notën më të ulët të mundshme, 4.00.
Ndërkohë, vetëm 29 nxënës kanë arritur të marrin notën maksimale, 10.00, duke treguar se ky test ka qenë më sfidues në krahasim me të tjerët. Pavarësisht një kalueshmërie të përgjithshme prej 98.58% dhe një note mesatare 6.87, rënia e qindra maturantëve ngre pikëpyetje mbi vështirësinë e testit apo përgatitjen e nxënësve.
Krahasuar me provimin e gjuhës së huaj, ku nxënësit patën performancë më të mirë, testi i gjuhës amtare duket se ka qenë më problematik.
Ky ishte provimi i dytë i maturës, pas atij të gjuhës së huaj të zhvilluar më 3 qershor. Më 10 qershor u mbajt testi i Gjuhës Shqipe dhe Letërsisë, ndërsa më 17 qershor ai i matematikës. Maturantët do ta përmbyllin maturën me provimin me zgjedhje më 24 qershor.
