Në maj të vitit 2017 emisioni “Stop” transmetoi rastin e një vrasjeje në Vloçisht të Korçës, në tetor të vitit 2012. Provat e sjella nga gazetari i emisionit, bënë të mundur rihapjen e çështjes pas 5 vjetësh për vrasjen e 58-vjeçarit, Ethem Hënës. Por prokurorja Oli Visi nuk bëri asgjë për të zbardhur vrasjen. Ajo nuk thirri asnjëherë dëshmitarin që kishte parë me sytë e tij konfliktin. Po kështu prokurorja Visi nuk bëri kurrë aktin e thelluar kimik.
Djali i viktimës, Erion Hëna, takoi prokuroren duke i thënë se po e çon drejt vetëgjyqësisë. Edison Kodralli, nga i njëjti fshat, u dyshua për vrasjen e të moshuarit në bazë të dëshmive, por edhe shenjave të barutit që iu gjetën në trup. Prokuroria urdhëroi arrestimin e të riut, por tre muaj më pas, prokurori i çështjes ndryshoi mendje duke kërkuar ndryshimin e masës së arrestit për Edison Kodralliun, pasi ky i fundit ka thënë se ditën e ngjarjes ka qenë në Maliq dhe ka salduar makinën.
Pas prokurores, edhe gjykata e Korçës pranoi kërkesën e pezullimit të çështjes, pa asnjë letër në dosjen e gjykimit. Si artificë për dështimin e procesit, u gjet mungesa e kryerjes së eksperimentit në Institutin e Policisë Shkencore në Tiranë, i cili nuk bënte dot analizë të thelluar që mund të jepte përgjigje për shenjat e barutit në rrobat e të dyshuarit.
Manipulimi i çështjes ka ndodhur hapur mes prokurorit të kohës dhe gjyqtares, e cila pranon faktin që autori është Edison Kodralli, por në fund vendos të ndryshojë masën e arrestit për të akuzuarin kryesor të kësaj vrasjeje.
Lidhur me vrasjen e Vloçishtit, pas kaq kohësh, emisioni “Stop” ka siguruar edhe 3 dëshmi nga dy bashkëfshatarë, të cilët kanë parë viktimën me autorin natën e ngjarjes duke debatuar. Po kështu edhe shefi i policisë që zbardhi vrasjen pohon se sipas dëshmive dhe provave, Edison Kodralli ka vrarë për motive të dobëta Ethem Hënën.
Ekspertët, ish-drejtori i Policisë Shkencore, Vladimir Ikonomi dhe ish-prokurori, Ervin Karanxha shpjegojnë se një deklaratë nuk mund të hedhë poshtë disa dëshmi dhe një provë shkencore të shenjave të barutit.
Sipas tyre, prokuroria dhe gjykata kanë nxjerrë qëllimisht dhe në shkelje të ligjit, autorin e vrasjes së Ethem Hënës, duke e lënë ngjarjen pa autor dhe autorin 14 vjet të lirë.
