Tensionet mes Izraelit dhe Iranit kanë arritur një nivel të ri përshkallëzimi ushtarak. Forcat Mbrojtëse të Izraelit (IDF) njoftuan se Irani ka lëshuar një breshëri raketash balistike drejt territorit izraelit.
Sirenat e alarmit janë aktivizuar në disa qytete, ndërsa sistemet izraelite të mbrojtjes ajrore po përpiqen të neutralizojnë kërcënimin. Autoritetet kanë urdhëruar civilët që të qëndrojnë në strehimore deri në njoftimin e mëtejshëm.
Në përgjigje, Izraeli ka nisur sulme ajrore ndaj objektivave ushtarake në Teheran, duke goditur pozicione strategjike në kryeqytetin iranian.
Nga ana tjetër, ushtria iraniane ka njoftuar lëshimin e mbi 100 raketave në kuadër të valës së dytë të operacionit “Premtimi i Vërtetë 3”.
Sipas raporteve të sigurisë izraelite, një tjetër sulm është kryer edhe në Jemen, me qëllim eleminimin e një udhëheqësi të rebelëve Huthi.
Lajmet konfirmohen nga mediat ndërkombëtare si La Repubblica dhe Times of Israel, duke nxjerrë në pah përshkallëzimin dramatik të konfliktit në Lindjen e Mesme dhe rrezikun për një përfshirje më të gjerë rajonale.
