Me ardhjen e valëve të të nxehtit, kondicioneri bëhet shpëtimtari i shumë familjeve. Megjithatë, përdorimi i tij në mënyrë të gabuar mund të ketë pasoja jo vetëm në faturën e energjisë, por edhe në efikasitetin e tij. Një eksperte nga një kompani pajisjesh shtëpiake, përmes një videoje në TikTok, ka treguar dy gabimet më të zakonshme që bëhen gjatë verës dhe që çojnë në rritjen e konsumit të energjisë elektrike.
Gabimi i parë, shumë i përhapur dhe njëkohësisht i pakuptimtë, është ndezja e kondicionerit ndërkohë që një dritare qëndron hapur. Kjo është e barasvlershme me përpjekjen për të mbushur një pishinë ndërsa uji rrjedh jashtë – aparati punon më shumë, ftoh më pak dhe rrit kostot.
Gabimi i dytë lidhet me përzgjedhjen e pajisjes. Shpesh, njerëzit zgjedhin një kondicioner me kapacitet më të ulët sesa kërkon hapësira e tyre, duke menduar se po kursejnë. Në fakt, kjo bën që pajisja të punojë me tejlodhje dhe jo me efikasitet.
Ekspertja gjithashtu paralajmëron kundër zakonit të fikjes dhe ndezjes së shpeshtë të kondicionerit. Në vend që të kursejë energji, ky veprim rrit konsumin, pasi ndezja e sistemit kërkon më shumë fuqi sesa funksionimi i qëndrueshëm në një temperaturë konstante. Këshillohet mbajtja e temperaturës mes 22°C dhe 25°C për një balancë të mirë mes komoditetit dhe kursimit.
Së fundi, pastrimi i rregullt i filtrave është thelbësor, neglizhenca në këtë drejtim mund të ulë efikasitetin deri në 15%. Po ashtu, njësia e jashtme duhet të vendoset në një vend të freskët dhe të ajrosur mirë, për të shmangur mbinxehjen dhe për të ruajtur performancën optimale të pajisjes.
