Dy ministra të Qeverisë izraelite, Itamar Ben-Gvir dhe Bezalel Smotrich, janë sanksionuar nga Mbretëria e Bashkuar për shkak të deklaratave të tyre për Gazën.
Ben-Gvir, ministër i Sigurisë në ekzekutivin e Benjamin Netanyahut, dhe Smotrich, ministër i Financave, që të dy do të përballen me ndalesë udhëtimi dhe ngrirje të aseteve.
Kjo lëvizje vjen teksa Mbretëria e Bashkuar dhe shtete të tjera perëndimore po kërkojnë të rrisin presionin ndaj Qeverisë izraelite, teksa po vazhdon lufta në Gazë.
Ministri i Jashtëm izraelit, Gideon Saar, tha se ishte “i zemëruar që përfaqësuesit e zgjedhur dhe anëtarët e Qeverisë iu nënshtrohen këtyre masave”.
“E kam diskutuar këtë çështje sot me kryeministrin Netanyahu dhe do të mbajmë një mbledhje të posaçme të Qeverisë javën e ardhshme për të vendosur për përgjigjen tonë ndaj këtij vendimi të papranueshëm”.
Smotrich dhe Ben-Gvir që të dy u përkasin partive të krahut të djathtë që bëjnë pjesë në koalicionin e brishtë qeverisës të Netanyahut.
Që të dy janë kritikuar për shkak të qëndrimit të ashpër që kanë për luftën në Gazë.
Smotrich ka bërë fushatë kundër lejimit të dërgimit të ndihmave në Gazë, ndërkaq Ben-Gvir ka kërkuar që popullsia e Gazës të zhvendoset nga territori palestinez.
Mbretëria e Bashkuar dhe aleatët e saj kanë rritur presionin ndaj Izraelit, teksa territori palestinez muajt e fundit është përballur me mungesë të ndihmave humanitare dhe në kohën kur Izraeli ka sugjeruar se mund të nisë një ofensivë të re në Gazë.
Së fundi, një fondacion – që ka mbështetjen e Shteteve të Bashkuara dhe Izraelit – ka nisur shpërndarjen e ndihmës në Gazë, por kjo nismë është kritikuar nga Kombet e Bashkuara.
Lufta në Gazë nisi në tetor të vitit 2023, pasi Hamasi – grupi palestinez i shpallur organizatë terroriste nga SHBA-ja dhe Bashkimi Evropian – sulmoi Izraelin, duke vrarë afër 1.200 persona dhe duke rrëmbyer afër 250 të tjerë.
Si pasojë e ofensivës izraelite, në Gazë janë vrarë më shumë se 54.000 persona dhe territori ka pësuar shkatërrime të mëdha. OKB-ja ka paralajmëruar se popullsia e Gazës po përballet me mungesë të theksuar të ushqimeve./REL
