Pothuaj gjysma e kutive të votimit në qarkun e Durrësit do të rinumërohen nga Komisioni Qendror i Zgjedhjeve.
Partia Demokratike shfrytëzoi dy anëtarët e propozuar nga ajo në Komisionin e Ankimimeve dhe Sanksioneve për të hapur 126 kuti që i përkasin territorit të Bashkisë Durrës. Do të rinumërohen votat e kandidatëve në 60 kuti, ku pretendon Aulon Kalaja parregullsi, dhe të gjitha votat e diasporës për këtë qark.
Rinumërimi i votave të Durrësit do të bëhet në ambientet e Pallatit të Sportit “Farie Hoti”, aty ku do numërohen votat e Tiranës dhe Fierit. Komisioneri Shtetëror i Zgjedhjeve, Ilirjan Celibashi, gjatë një komunikimi me gazetarët sqaroi se procesi i rinumërimit do të bëhet nga stafi i KQZ.
“Parashikohet që për qarkun e Tiranës dhe të Fierit ky proces të zgjasë 18-20 ditë”, tha Ilirjan Celibashi.
Duke marrë parasysh kohën që kërkon procesi i rinumërimit si dhe procesin e ankimimit në Kolegj Zgjedhor, Celibashi parashikon se rezultati përfundimtar i zgjedhjeve mund të dalë rreth mesit të muajit gusht.
“Do vazhdojmë pa ndërprerje, gjithë administrata do jetë në punë, kemi anuluar dhe lejet vjetore për gjithë stafin, për të qenë në punë edhe gjatë korrikut edhe gushtit. Edhe gjysma e parë e muajit gusht do na gjejë të angazhuar me procesin zgjedhor të 11 majit”, u shpreh Celibashi.
Përveç këtyre qarqeve, do të rinumërohen edhe 44 kuti në Dibër me kërkesë të kandidatit të PD, Xhemal Gjunkshi.
