Sekretari amerikan i Mbrojtjes, Pete Hegseth, ka paralajmëruar dislokimin e mundshëm të trupave të marinsave në terren, nëse vazhdojnë përplasjet e dhunshme gjatë protestave kundër dëbimeve masive në Los Anxhelos.
Në një deklaratë për shtyp, Hegseth theksoi se sulmet ndaj forcave federale janë “të qëllimshme dhe të orkestruara”, me synimin për të penguar dëbimin e emigrantëve të paligjshëm dhe individëve të përfshirë në veprimtari kriminale. Ai akuzoi kartelet kriminale për nxitjen e trazirave, duke i cilësuar si “organizatë të huaj terroriste” dhe një kërcënim serioz për sigurinë kombëtare të SHBA-së.
“Nën Presidentin Trump, çdo dhunë ndaj autoriteteve federale do të përballet me forcë. Është çështje sigurie dhe ligji,” deklaroi Hegseth, duke nënvizuar se çdo përshkallëzim i mëtejshëm do të sjellë ndërhyrje të drejtpërdrejtë nga forcat ushtarake.
Sipas CBS News, disa qindra marinsa në bazën ushtarake Camp Pendleton janë vendosur në gjendje gatishmërie të lartë. Paraprakisht, janë dislokuar rreth 300 trupa të Gardës Kombëtare në tre pika strategjike të Los Anxhelosit, me urdhër të Presidentit Trump.
Komanda Veriore e SHBA-së ka konfirmuar se operacioni është aktiv dhe synon të ruajë rendin publik dhe të sigurojë zbatimin e politikave të emigracionit.
