Tmerr në Romë, ku trupat e një foshnje të porsalindur dhe një gruaje u gjetën të shtunën pasdite në Villa Pamphili, një nga mushkëritë e gjelbra të Romës.
Trupi i vajzës së vogël, rreth gjashtë muajshe, ndodhej pranë një gardhi, në bimësi jo shumë larg Fontana del Giglio. Në një distancë prej rreth 100 metrash, trupi i një gruaje u gjet më pas brenda një thesi.
Ende nuk dihet nëse bëhet fjalë për trupat e nënë e bijë apo kombësia e tyre, megjithatë, nuk janë përjashtuar asnjë pistë hetimi, përfshirë një lidhje të mundshme midis dy viktimave. Hetuesit po kontrollojnë kamerat e sigurisë në zonë me shpresën se pajisjet mund të kenë kapur personin ose personat që vendosën të hiqnin qafe të porsalindurin dhe gruan.
Gruaja u gjet nga hetuesit gjatë hetimeve të para që filluan pasi disa kalimtarë, rreth orës 4 pasdite, kishin kërkuar ndërhyrjen e policisë pasi kishin vënë re trupin e vajzës së vogël.
Misteri i dyfishtë tërhoqi menjëherë në vendngjarjeje shumë patrulla policie, bashkë me njësinë e Hetimeve Shkencore, një ambulancë, një automjet të zjarrfikësve, si dhe prokurorin e Prokurorisë së Romës, Antonio Verdi.
“Do të marrim ADN-në. Nuk vumë re asnjë plagë te gruaja, por është shumë herët për ta thënë.”, tha prokurori.
