Presidenti amerikan, Donald Trump ka kundërshtuar publikisht propozimin bërthamor të administratës së tij ndaj Iranit, duke theksuar se nuk do të lejojë pasurimin e uraniumit, vetëm disa orë pas raportimeve që treguan se negociatorët e tij i kishin ofruar Teheranit të drejta të kufizuara pasurimi.
“Sipas Marrëveshjes sonë të mundshme — NE NUK DO TË LEJOJMË ASNJË PASURIM TË URANIUMIT!” shkroi Trump në platformën e tij në mediat sociale Truth Social, të hënën në mbrëmje.
Deklarata e tij erdhi pas një raporti të Axios të hënën, i cili përmendi se një propozim i detajuar, i dorëzuar të shtunën nga i dërguari special i SHBA-së për Lindjen e Mesme, Steve Witkoff, i ofronte zyrtarëve iranianë mundësinë të mbante pasurimin e uraniumit në nivele të ulëta për qëllime civile, përfshirë përdorime në mjekësinë bërthamore dhe prodhimin komercial të energjisë.
Pas reagimit të Trump, Axios përditësoi raportin e saj, duke theksuar se propozimi kishte shkaktuar shqetësime të menjëhershme midis mbështetësve të Iranit në Uashington dhe Izrael, përpara se vetë Trump të ndërhynte.
“Pyetja është nëse Trump do t’i përmbahet asaj vije të kuqe apo do të tregojë më shumë fleksibilitet për të siguruar një marrëveshje sesa sugjeron deklarata e tij”, tha ajo.
Sekretarja e Shtypit e Shtëpisë së Bardhë, Karoline Leavitt, mbrojti propozimin, duke e quajtur atë “shumë të ashpër”, por refuzoi të shpjegonte mospërputhjen.
Ndërkohë, sekretari i Shtetit i SHBA-së, Marco Rubio, dhe zyrtarë të tjerë të lartë kanë thënë vazhdimisht se çdo marrëveshje bërthamore do të kërkonte që Irani të çmontonte plotësisht kapacitetet e tij të pasurimit të uraniumit.
Irani ka theksuar vazhdimisht se nuk do të nënshkruajë asnjë marrëveshje që nuk lejon pasurimin e uraniumit për qëllime civile.
Zëdhënësi i Ministrisë së Jashtme iraniane, Esmaeil Baghaei, tha se Teherani nuk do të pranojë një propozim të tillë bërthamor të SHBA-së, që përmban kërkesa “radikale dhe maksimale”.
Ai e bëri këtë koment gjatë një konference për shtyp në Teheran, ku po komentonte një propozim të mundshëm bërthamor që i ishte dorëzuar Iranit të shtunën nga Ministri i Jashtëm i Omanit, Sayyid Badr bin Hamad bin Hamood Albusaidi.
