Policia e Tiranës ka arrestuar një 43-vjeçar, i cili ishte shpallur në kërkim pasi është dënuar me 11 vite burg për vrasje me dashje dhe armëmbajtje pa leje.
Blutë kanë vendosur në pranga Klement Zguro (Kaçolli), banues në Tiranë, i cili konsiderohet me rrezikshmëri të lartë shoqërore në fushën e krimeve kundër personit.
“Mbi bazën e informacioneve të siguruara në rrugë operative, u organizua dhe u finalizua me sukses operacioni policor i koduar “END”, si rezultat i të cilit u bë kapja, në rrugën “Mikel Maruli”, e shtetasit në kërkim Klement Zguro (Kaçolli), 43 vjeç, banues në Tiranë”, njoftoi policia.
Gjykata e Apelit Korçë e ka dënuar 43-vjeçarin me 11 vite burg për veprat penale “Vrasja me dashje” dhe “Armëmbajtja pa leje”.
Klement Zguro (Kaçolli) i kanë mbetur për të vuajtur 8 vite e 11 muaj burgim.
Njoftimi i policisë:
Tiranë/Finalizohet operacioni policor i koduar “END”.
Operacioni nga Komisariati i Policisë Nr. 3, për kapjen e personave të shpallur në kërkim, me rrezikshmëri të lartë shoqërore në fushën e krimeve kundër personit.
Kapet 43-vjeçari i dënuar me 11 vite burg, për vrasje me dashje dhe armëmbajtje pa leje.
Në vijim të punës për lokalizimin e vendndodhjes dhe kapjen e personave në kërkim, shërbimet e Komisariatit të Policisë Nr. 3 kanë bërë lokalizimin e vendndodhjes së një personi të shpallur në kërkim për vrasje me dashje dhe armëmbajtje pa leje.
Mbi bazën e informacioneve të siguruara në rrugë operative, u organizua dhe u finalizua me sukses operacioni policor i koduar “END”, si rezultat i të cilit u bë kapja, në rrugën “Mikel Maruli”, e shtetasit në kërkim Klement Zguro (Kaçolli), 43 vjeç, banues në Tiranë.
Gjykata e Apelit Korçë e ka dënuar këtë shtetas me 11 vite burgim, për veprat penale “Vrasja me dashje” dhe “Armëmbajtja pa leje”. 43-vjeçarit i kanë mbetur për të vuajtur 8 vite e 11 muaj burgim.
43-vjeçari iu dorëzua DVP Korçë, për veprime të mëtejshme procedurale.
