Autoriteti Kombëtar i Ushqimit ka reaguar lidhur me lajmin e publikuar ditën e sotme sa i takon filetove me mish derri të kontaminuara me salmonelë të cilat u raportua se nuk janë asgjesuar.
Sipas AKU, sasi prej 4516,75 kg fileto mish derri e importuar nga Brazili, e cila rezultoi e kontaminuar me bakterin Salmonella spp, është asgjesuar në përputhje të plotë me protokollet e sigurisë ushqimore.
Në një deklaratë për mediat, AKU ka shprehur shqetësimin për përhapjen e lajmeve të pasakta në disa media dhe portale lidhur me sigurinë ushqimore, duke sqaruar situatën me transparencë të plotë.
Sipas AKU-së, kjo sasi mishi është bllokuar menjëherë më datë 28 janar 2025, pas daljes së rezultateve nga analizat përkatëse, ku u konstatua praninë e Salmonella spp. Gjatë gjithë kësaj kohe, mishi ka qëndruar i izoluar në ambientet e subjektit importues, deri më 16 prill 2025, kur ky subjekt ka paraqitur kërkesën për asgjësim pranë institucioneve përkatëse: Inspektorati Kombëtar i Mbrojtjes së Territorit (Drejtoria e Inspektimit të Mjedisit dhe të Ujërave), Drejtoria Rajonale e Tatimeve Tiranë dhe Drejtoria Rajonale AKU Tiranë.
AKU thekson se procesi i asgjësimit është kryer në prani të përfaqësuesve të të gjitha autoriteteve kompetente dhe garanton konsumatorët se asnjë sasi nga kjo ngarkesë nuk ka hyrë në treg.
“Autoriteti Kombëtar i Ushqimit mbetet i angazhuar maksimalisht për të garantuar sigurinë ushqimore dhe për të mbrojtur shëndetin e qytetarëve”, përfundon deklarata.
