Ashtu siç ishte paralajmëruar më parë, Taulant Xhaka ka vendosur t’i japë fund karrierës së tij si futbollist aktiv. Në ndeshjen e tij të fundit, klubi i Basel-it organizoi një ceremoni të veçantë për ta nderuar, duke e përshëndetur për kontributin e tij shumëvjeçar.
Në këtë moment lamtumire ishte i pranishëm edhe vëllai i tij, Granit Xhaka. Emocionet ishin të mëdha për të dy, aq sa nuk i përmbajtën dot lotët.
Tifozët e Basel-it i dhuruan Taulantit një koreografi mbresëlënëse, duke e falënderuar për besnikërinë dhe përkushtimin që ka treguar përgjatë gjithë karrierës së tij.
Mesfushori shqiptar ka qenë një prej figurave simbol të klubit zviceran, për të cilin ka luajtur për më shumë se dhjetë vjet. Ai e përmbylli karrierën me një titull kampion, duke i dhënë gjithçka klubit të zemrës, përveç dy sezoneve të huazimit te Grasshoper.
Me mbi 400 paraqitje në fushë, Taulant Xhaka vendosi të “varë këpucët në gozhdë”, duke përmbyllur një rrugëtim të jashtëzakonshëm në futbollin profesionist.
Në arenën ndërkombëtare, ai veshi fanellën kuqezi të Shqipërisë në 31 ndeshje, duke shënuar një gol ndaj Izraelit në shtator të vitit 2018. Nga Kombëtarja u tërhoq në vitin 2021.
