Nga qelia, Erion Veliaj, ka publikuar sot një shënim në Facebook, ku ka shënuar 100 ditët e ndalimit të tij.
Në mesazhin e tij, Veliaj e cilëson burgimin si të padrejtë dhe politikisht të motivuar, duke e konsideruar si një pengesë të rëndë ndaj ushtrimit të detyrës së tij si kryebashkiak.
Ai shprehet i vendosur për të vijuar betejën ligjore dhe për të mbetur i përkushtuar ndaj qytetarëve të Tiranës, pavarësisht kushteve në të cilat ndodhet.
“Shumë të dashur miq,
Sot bëhen 100 ditë nga burgimi im pa asnjë justifikim të arsyeshëm. Ndalimi im i padrejtë dhe arbitrar vazhdon, megjithëse nuk jam akuzuar për asnjë vepër penale. Si pasojë, po pengohem forcërisht nga ushtrimi i detyrave të mia si Kryetar i zgjedhur, me votë masive 3 herë, i Bashkisë së Tiranës.
Vazhdimi i këtij paraburgimi nuk përbën vetëm një sulm ndaj meje dhe familjes sime, por është edhe një ndërhyrje e panevojshme dhe joproporcionale në përmbushjen e detyrave publike, që më janë besuar nga qytetarët e Tiranës. Pavarësisht burgimit mbetem i papërkulur. Çdo ditë që kalon, ma forcon edhe më shumë vendosmërinë. Angazhimi im ndaj Tiranës, ndaj jush, ndaj demokracisë, sundimit të ligjit dhe të ardhmes së Shqipërisë mbetet i palëkundur.
Do të vazhdoj të ndjek të gjitha rrugët ligjore për të siguruar lirimin tim, në mënyrë që të vazhdoj t’i shërbej qytetit tonë të mrekullueshëm si kryebashkiaku juaj.
Me mall dhe dashuri për secilin prej jush!”, shkruan Veliaj.
