Kryeministri Edi Rama i ka dërguar një mesazh kandidatëve të Partisë Socialiste që kanë ankimuar në Komisionin Qendror të Zgjedhjeve rezultatet e 11 majit, nën dyshimet për një proces numërimi votash të manipuluar.
Në mesazhin e tij, Rama shprehet që kandidatët të mos vijojnë me ankimimet, duke shtuar se të gjithë bashkë janë një skuadër, që nuk mund të humbin fytyrën për një garë. Sipas tij, ka zero shanse që votat preferenciale të jenë devijuar.
Ky mesazh është dërguar pasi kandidatja Blerina Gjylameti, kërkoi rinumërim të votave, pasi humbi mandatin përballë Olta Xhaçkës.
‘’Kam marrë njoftim me trishtim për disa iniciativa individuale, për të kërkuar filmime, rinumërime e ku di unë çfarë tjetër për votën preferenciale! Natyrisht që s’mund të ndaloj askënd të veprojë me kokën e vet, por, duke qenë se këtu në këtë dritare jemi ende një skuadër – dhe unë dua që kështu të mbetemi – do të këshilloja që të mos i hyhet asaj rruge.
Sepse, së pari, humbja e një gare s’duhet të bëhet shkak për të humbur edhe fytyrën, kur në fakt nuk ka asnjë shans, zero, që me gjithë ata sy mbi ekrane, të ketë devijime vote në përmasa që do ta mbushnin hendekun e kujtdoqoftë me ata që kanë dalë fitues – jo me 10 a 20, por me shumë më tepër vota diferencë nga pasuesit në klasifikim.
Së dyti, kjo do të thotë të hidhet hije mbi njerëzit tanë, që kanë qëndruar pafundësisht nëpër tryeza numërimi, e që nuk e meritojnë kurrkund një hije të tillë dyshimi për kontributin e tyre të madh.
E së fundi, përfytyrojeni vetë se sa keq do të ndjehet kushdo që do t’i hyjë kësaj rruge, duke ushqyer qenerinë mediatike, kur në fund, mali i mbarsur mund të mos pjellë as një mi,”-shkruan Rama në mesazhin e tij.
