Përmes një postimi në rrjetet sociale, deputeti demokrat Dashnor Sula ka kërkuar që Kuvendi të mblidhet sa më parë. Sula, i cili nuk u përfshi në listën e kandidatëve për deputetë në zgjedhjet e 11 majit, thekson se Parlamenti nuk është mbledhur që nga data 16 mars dhe se duhet të rifillojë punën në përputhje me detyrimet që i përcaktojnë Kushtetuta dhe ligji.
Ai gjithashtu bën apel për mbledhjen e Konferencës së Kryetarëve, me qëllim hartimin e një agjende për raportimet e institucioneve kushtetuese në Kuvend.
Në thirrjen e tij, Sula iu drejtua veçanërisht palëve politike që morën pjesë në zgjedhje, duke theksuar se është koha që PS-ja të lërë festimet dhe PD-ja të tejkalojë zhgënjimin, për t’u përqendruar në respektimin e Kushtetutës dhe shqyrtimin e raportimeve vjetore të institucioneve si SPAK, KLSH dhe Prokuroria e Përgjithshme.
Postimi:
Kuvendi ti rikthehet punës!
Gëzimet dhe fatkeqësitë nuk duhet të shërbejnë si argument që shteti të rrëshkas në paligjshmëri. Parlamenti nuk është mbledhur që prej datës 16 Mars, 1 muaj e gjysmë para datës së zgjedhjeve, ndonëse zyrtarisht fushata zgjat vetëm një muaj.
Megjithatë, ato që kaluan nuk zhbëhen më. Cka kemi në dorë ne të bëjmë është që të kthehemi në rrugën e ligjshmërisë. Pra, Kuvendi dhe Parlamenti duhet të rikthehen në punë dhe të vijojnë me detyrat që I përcakton Kushtetuta, Ligji dhe rregulloret.
Kushtetuta sanksionon që institucionet e pavarura raportojnë, japin llogari para kuvendit të shqipërisë. Ndërsa Rregullorja e kuvendit në nenin 103 pika 10 parashikon që raportimi i të gjitha institucioneve kushtetuese dhe të krijuara me ligj duhet të përfundojë raportimin e tyre para ligjvënësve jo më gjatë se fundi i muajit Qershor.
Në një kohë kur kemi dhjetra institucione të rëndësishme kushtetuese apo te krijuara me ligj që do duhet të raportojnë para ligjvënësve, duhet të mblidhet një orë e më parë Konferenca e Kryetarëve dhe të caktojë një agjendë të qartë dhe të ngarkuar për raportimine këtyre institucioneve.
Njëra palë duhet të ndalë festën dhe tjetra të vijojë vajtimin në seli dhe të dyja palët duhet të zbatojën Kushtetutën, Ligjet Organike dhe Rregulloren e Kuvendit dhe të mbledh komisionet për të shqyrtuar raportin vjetor të Bankës së Shqipërisë, SPAK-ut, Prokurorisë së Përgjithëshme, KLSH-së dhe gjithë institucioneve të tjera që përcaktohen në Kushtetutë.
