Koalicioni “Nisma Shqipëria Bëhet” ka arritur të sigurojë një mandat në Kuvendin e Shqipërisë pas votimeve të 11 majit. Pas shpalljes së rezultateve zgjedhore, drejtuesi i këtij koalicioni, Adriatik Lapaj, reagoi përmes një postimi në rrjetet sociale, duke shprehur zhgënjimin për faktin që koalicioni mori vetëm një mandat, ndonëse sipas tij meritonte më shumë.
Lapaj kritikoi sistemin aktual elektoral, duke e cilësuar atë të padrejtë. Ai solli në vëmendje një krahasim midis rezultatit të Partisë Socialiste dhe atij të koalicionit që përfaqëson: PS fitoi një mandat me rreth 10 mijë vota, ndërsa “Nisma Shqipëria Bëhet” me afro 63 mijë vota siguroi po ashtu vetëm një mandat.
Në këtë kontekst, ai bëri thirrje për ndryshimin e ligjit zgjedhor dhe propozoi që të adoptohet modeli i Kosovës, që bazohet në proporcionalitetin kombëtar dhe lista të hapura.
Në përfundim, Lapaj falënderoi të gjithë mbështetësit dhe theksoi se koalicioni do të vijojë të punojë për vlerat që përfaqëson.
Postimi i drejtuesit të koalicionit “Nisma Shqipëria Bëhet”, Adriatik Lapaj:
Lëvizja Shqipëria Bëhet u kthye në parti politike në dt. 30 shtator 2024.
Për 8 muaj, me gjithë vështirësitë që ju i dini i’a dolëm të renditemi forcë e 3 politike në vend (përballë atyre që kërcënojnë, blejnë dhe vjedhin votë).
Faleminderit secilit që na besoi me votë!
Sistemi elektoral u dëshmua para të gjithëve si i padrejtë. Ps e nxori 1 mandat me afro 10 000 vota, ndërsa koalicioni ynë me afro 63 000 (deri tani).
Ps ka marrë vota sa për 73 mandate, por ligji elektoral i padrejtë i ka dhënë 83.
Koalicioni ynë duhet të kishte të paktën 6 mandate. Duhet ndryshuar ligji elektoral. Shikoni modelin e Kosovës, proporcional kombëtar me lista të hapura.
Lëvizja Shqipëria Bëhet është e hapur për këdo beson te vlerat, të na bashkohet!
