Kryeministrja e Italisë, Giorgia Meloni, sqaroi për mediat se cila ishte arsyeja pse ajo nuk ishte pjesë e bisedës telefonike mes liderëve të Britanisë, Francës, Gjermanisë, Polonisë dhe Ukrainës me presidentin amerikan Donald Trump.
Meloni u shpreh e qartë se nuk kishte kuptim që ajo të merrte pjesë në një format të tillë mes vendeve europiane për sa kohë e ka bërë të qartë se Italia nuk është e gatshme të dërgojë trupa ushtarake në Ukrainë.
“Në lidhje me mungesën e Italisë në takimin mes Britanisë së Madhe, Francës, Polonisë, Gjermanisë dhe Ukrainës, dëshiroj të theksoj diçka që e kam shpjeguar disa herë më parë: Italia e ka bërë prej kohësh të qartë se nuk është e gatshme të dërgojë trupa në Ukrainë. Nuk do të kishte kuptim që të merrnim pjesë në formate të cilat kanë si objektiv diçka për të cilën ne nuk kemi shprehur gatishmërinë tonë. Mendoj se kjo është një çështje qartësie dhe koherence”, tha Meloni në një prononcim për gazetarët.
“A na kërkoni të marrim pjesë në këto formate sepse duhet të dërgojmë trupa në Ukrainë, apo thjesht për të bërë një fotografi dhe më pas të themi “jo”? Sepse për çështje të tilla duhet të jemi seriozë, dhe unë jam një person serioz”, u shpreh ajo.
Pavarësisht kësaj, Meloni thekson se Italia do vijojë ta mbështesë Ukrainën, njëkohësisht do të marrë pjesë edhe në tryezat e tjera. Megjithatë edhe njëherë qartësoi se për këtë nismë specifike Italia nuk ka dhënë gatishmërinë e saj.
“Shpresoj që, edhe një herë, të kem qenë shumë e qartë”, u shpreh ajo.
Kujtojmë se gjatë samitit të Komunitetit Politik Europian, Ukraina mori vëmendjen kryesore. Donald Trump “iu bashkua” liderëve të tjerë në Europë nëpërmjet një telefonate, ku diskutuan përgjigjen e përbashkët ndaj Rusisë për refuzimin e një armëpushimi me Ukrainën.
