Pas dekadash mister, shkencëtarët nga Japonia dhe SHBA kanë zbuluar pse disa mace kanë gëzofin portokalli dhe pse shumica prej tyre janë meshkuj.
Hulumtimi i publikuar nga Universiteti Kyushu dhe Universiteti Stanford zbulon se macet portokalli kanë një pjesë të munguar të ADN-së në një gjen të quajtur ARHGAP36, që ndikon në prodhimin e pigmentit. Kjo mungesë bën që qelizat e ngjyrës (melanocitet) të prodhojnë tone më të çelëta, si portokallia.
Pse janë kryesisht meshkuj?
Gjeni ndodhet në kromozomin X. Meshkujt kanë vetëm një kromozom X, ndaj mjafton që ADN-ja të mungojë aty për të shfaqur ngjyrën portokalli. Femrat, që kanë dy kromozome X, duhet ta kenë mungesën në të dyja për të qenë tërësisht portokalli – përndryshe shfaqen me ngjyra të përziera si “calico”.
Zbulim i mbështetur nga dashuria për macet
Kërkimi u financua përmes një fushate “crowdfunding”, ku mijëra dashamirës të maceve në mbarë botën, përfshirë edhe fëmijë, kontribuan për të zbuluar këtë mister.
Shkencëtarët po hetojnë gjithashtu nëse ky ndryshim gjenetik lidhet me sëmundje apo sjellje të caktuara, pasi gjeni ARHGAP36 ndikon edhe në zona të tjera të trupit, përfshirë trurin dhe gjëndrat hormonale.
