Më 16 maj, Tirana do të jetë mikpritëse e Samitit të 6-të të Komunitetit Politik Evropian, një ngjarje madhore që sjell në kryeqytetin shqiptar 47 liderë nga mbarë Evropa.
Samiti organizohet nga Presidenti i Këshillit Evropian, António Costa, dhe Kryeministri Edi Rama, dhe do të zhvillohet në sheshin “Skënderbej” nën moton “Evropa e re në një botë të re: unitet, bashkëpunim, veprim i përbashkët”. Ceremonia hapëse pritet të nisë në orën 11:00, e pasuar nga seanca plenare ku do të diskutohen siguria dhe vizioni i përbashkët për të ardhmen e Evropës. Më pas, pas drekës, do të zhvillohen takime bilaterale, ndërsa konferenca përmbyllëse do të mbahet në orën 18:30, e udhëhequr nga Rama dhe homologu i tij danez.
Ambjentet e samitit janë vendosur pas monumentit të Skënderbeut, të zbukuruara me vizatime të nxënësve shqiptarë që shprehin perceptimin e tyre për Evropën. Në këtë kontekst, Kryeministri Rama i drejtohet figurës së heroit kombëtar, duke deklaruar: “Më 16 maj, nga të gjitha anët e Europës do të mblidhen në sheshin tënd, o mbret”, dhe shton se shqiptarët do të jenë krenarë për emrin e Shqipërisë që do të kumbojë në të gjitha gjuhët e botës.
Pritja zyrtare e liderëve do të zhvillohet para Muzeut Historik Kombëtar, për të vijuar më pas në godinën e Operës dhe në strukturat e përkohshme të ndërtuara posaçërisht për samitin. Tryezat tematike do të fokusohen në sfida kyçe si siguria dhe qëndrueshmëria demokratike, konkurrueshmëria ekonomike, lëvizshmëria dhe fuqizimi i të rinjve në shkallë evropiane.
Ky samit vjen si dëshmi e rolit në rritje të Shqipërisë në proceset politike të kontinentit.
Ndër liderët pjesëmarrës janë Kryeministri britanik Keir Starmer, Presidenti francez Emmanuel Macron, Kryeministrja italiane Giorgia Meloni, Presidenti ukrainas Volodymyr Zelensky, Kryeministri spanjoll Pedro Sánchez, Presidentja e Komisionit Evropian Ursula von der Leyen, Presidentja e Kosovës Vjosa Osmani, Presidenti serb Aleksandar Vuçiç, Kryeministri polak Donald Tusk, Presidenti turk Recep Tayyip Erdogan dhe të tjerë.
Disa prej tyre pritet të mbërrijnë në Tiranë një ditë më parë për takime me Kryeministrin Rama.
Ndërkohë, është konfirmuar se Kryeministri britanik do të mbërrijë sot, për të shpallur masa të reja kundër emigracionit të paligjshëm dhe grupeve kriminale që trafikojnë njerëz drejt Mbretërisë së Bashkuar.
Komuniteti Politik Evropian është krijuar si një platformë për bashkëpunim politik dhe stabilitet në kontinent, ndërsa organizimi i samitit në Tiranë e pozicionon Ballkanin si një faktor kyç në arkitekturën evropiane të sigurisë dhe bashkëpunimit.
