Gazment Bardhi ka reaguar pas rezultatit zhgënjyes të zgjedhjeve në Fier, ku Partia Demokratike siguroi vetëm katër mandate, duke humbur edhe një tjetër nga lista mbyllur, ndërsa Partia Socialiste arriti të fitojë 12 mandate.
Bardhi nuk ishte parë në publik që nga dita e votimeve, teksa gazetarët e kërkuan në qendrat e numërimit, por ai nuk u shfaq.
Me anë të një deklarate në “Facebook”, Bardhi shprehet se është “zemërthyer” nga rezultati, por thekson se nuk do të heqë dorë nga beteja politike.
Ai nuk ka shkruar asnjë rresht për marrje përgjegjësie për rezultatin, duke lënë të nënkuptohet se dorëheqja është një plan i cili as që mendohet.
Reagimi i plotë:
Një falenderim zemre
Me zemër të thyer se zgjedhjet e 11 Majit nuk ia dolën të shprehin vullnetin real të qytetarëve, dua të falenderoj me përulësi të gjithë ata demokratë dhe mbështetës të opozitës që i besuan votën Partisë Demokratike! Në qarkun e Fierit, ne ishim njerëzit e lirë përballë një bande ministrash dhe drejtorësh të korruptuar, që përdorën shtetin dhe krimin e organizuar për të ruajtur pushtetin!
Ju falenderoj me zemër për qendresën dhe besimin! Një falenderim të veçantë për strukturat e Partisë Demokratike, komisionerët, vëzhguesit dhe numëruesit e palodhur!
Ne do të qendrojmë së bashku të panënshtruar sepse Shqipëria ka nevojë për njerëz të lirë!
