Presidenti i Republikës, Bajram Begaj, përcolli sot një mesazh urimi me rastin e Ditës së Evropës, duke theksuar lidhjen e thellë të Shqipërisë me kontinentin evropian.
Në mesazhin e tij, Presidenti Begaj vlerësoi se Shqipëria i përket Evropës jo vetëm gjeografikisht, por edhe shpirtërisht, duke ndarë me të vlerat e paqes, solidaritetit dhe unitetit.
“Sot ne festojmë Ditën e Evropës, të cilës i përkasim gjeografikisht e shpirtërisht dhe me të cilën ndajmë të njëjtat vlera të paqes, solidaritetit dhe unitetit. Integrimi ynë në Evropën e Bashkuar është i sigurt dhe i pakthyeshëm,” – deklaroi Kreu i Shtetit.
Dita e Evropës shënon çdo vit përvjetorin e Deklaratës së Shumanit të vitit 1950, që vendosi themelet për krijimin e Bashkimit Evropian dhe promovon idenë e bashkimit dhe paqes mes kombeve të kontinentit.
