Rama është një njohës i mirë i botës virtuale. Ndoshta kjo shpjegon pse takimet e tij janë të përqendruara te kontenti viral.
Etiketimin e Berishës si buf, PD-së si kënetë, apo dështimin e tyre e lidh me Noc Rrokun, nuk janë etike, por prodhojnë viralitet.
Megjithatë, Rama bëri një autogol sa i përket fushatës online duke ndihmuar kundërshtarin e tij, Sali Berisha. Flirtimi i tij me Ilir Vrenozin, një militant të PD-së mjaft i njohur në rrjetet sociale, rriti ndjeshëm Sali Berishën dhe kërkimet për të në botën virtuale.
“Edhe politikanët kanë gjetur gjuhën e social medias dhe po flasin me gjuhën e social medias dhe jo politikës, masa nuk të kupton. Vetëm dalja e Ilir Vrenozit me Sali Berishën e rriti Sali Berishën me 20 pikë në Google Search, vetëm se ndodhi kjo histori,” u shpreh Tomi Kallanxhi, ekspert IT.
Rama tentoi ta merrte në podcastin që realizon, por Vrenozi refuzoi dhe madje u kujdes që këtë ta zbulojë LIVE. Refuzimi që i bëri shefit të qeverisë, u kthye në lajtmotiv të fushatës së demokratëve. Tentativa e barazimit të PD Korce me një personazh viral si Ilir Vrenozi nuk është e paqëllimshme, por në aspektin e fushatës elektorale online, u kthye në plus për PD.
Duke qenë se brezi i ri është i përqendruar te social media, ka ndryshuar dhe kultura e të bërit fushatë në këto zgjedhje. Kjo ka bërë që kandidatët për deputetë, kryesisht të listave të hapura, të krijojnë ekipet e tyre të realizimit të kontentit.
“Parimisht kanë qenë dhe online, por dhe offline nuk kanë qenë keq. Me fotograf, videoeditor, etj, etj. Nëse më përpara staf kishte vetëm partia dhe kryetari, tani kanë të gjithë kandidatët për deputetë, sidomos ata të listave të hapura. Secili prej tyre prodhon video, spote, etj,” u shpreh Tomi Kallanxhi, ekspert IT.
Diçka të tillë nuk e konfirmojnë vetëm ekspertët e fushës, por dhe bizneset që merren me prodhimin e banerave, fletëpalosjeve, apo sendeve të tjera të personalizuara, që po ndjejnë konkurrencën e reklamave dixhitale.
“Sa u përket fletëpalosjeve, duke e krahasuar dhe me 4 vite më parë, kemi parë dhe ne një rënie. Partitë politike dhe kandidatët janë duke u fokusuar më shumë drejt online. Te janë afruar për moshat më të mëdha, që të ftohen ata për të votuar,” u shpreh Andi Hoxhaj, menaxher i VASSI.AL.
Dhe në fakt, mjafton një vëzhgim i shpejtë në rrjetet sociale për ta kuptuar diçka të tillë.
Përdorimi i rrjeteve sociale në fakt është një art në vete, pasi politika po investohet dhe mundohet t’i marrë maksimumin, por ende nuk janë në nivele profesionale. Partitë politike, apo kandidatët nuk kanë pasur një strategji të mirëfilltë marketingu, pasi nuk kanë arritur të ndajnë mesazhet duke u bazuar në rrjetet sociale që shpërndajnë./tch
