Policia e Lezhës ka proceduar penalisht në gjendje të lirë kandidatin e Partisë Demokratike në Lezhë, Gjin Gjonin.
Përmes një njoftimi blutë e Lezhës bëjnë me dije se procedimi ndaj Gjonit ka ardhur pas denoncimit disa zyrtarëve të Partisë Socialiste për të cilët demokrati përmes një postimi në “Facebook” tha se janë implikuar në blerje votash për zgjedhjet e 11 Majit.
“Shërbimet e Komisariatit të Policisë Lezhë referuan materialet në Prokurori, ku nisi procedimi në gjendje të lirë, për veprën penale “Shpifja”, për shtetasin Gj. Gj., 55 vjeç, banues në Lezhë, kandidat për deputet i subjektit politik “Partia Demokratike”, pasi kanë kallëzuar shtetasit D. P., E. L., E. S., P. Gj. dhe R. N. (përfaqësues dhe simpatizantë të subjektit politik “Partia Socialiste”), se 55-vjeçari ka publikuar në rrjetin social “Facebook”, një postim, nëpërmjet të cilit shpif se 5 shtetasit janë të implikuar në blerje votash dhe intimidim zgjedhësish”, njofton Policia.
