Deputetët e Kuvendit të Kosovës do të mblidhen përsëri sot në përpjekjen e radhës për të finalizuar konstituimin e Kuvendit. Lëvizja Vetëvendosje si fituese e zgjedhjeve ka dështuar për herë të disatë radhazi që të sigurojë 61 vota për ta zgjedhur Albulena Haxhiun si pasuese të Glauk Konjufcës.
Në seancën e fundit, partia e Albin Kurtit përmes Avni Deharit si kryesues i seancës, tentoi të ndryshonte mënyrën e votimit, por pa sukses. Sipas tyre, nëse votimi do të bëhet në mënyrë të fshehtë, deputetët s’do të kishin presion dhe do të votonin më lirshëm.
Votimin e fshehtë e duan edhe në seancën që do të mbahet sot në orën 10:00 dhe këtë e ka paralajmëruar edhe deputeti Hekuran Murati, i cili përmes një reagimi në orët e vona të së premtes i kërkonte opozitës që ta përkrahin kandidaturën e Haxhiut për kryeparlamentare dhe sugjeronte mënyrën e fshehtë të votimit.
“Marrë parasysh situatën në të cilën gjendemi, mendoj që mënyra e votimit të fshehtë, e sugjeruar edhe nga Gjykata Kushtetuese, ofron mundësinë ideale për të dalë nga bllokada dhe deputetët e zgjedhur të mund të çojnë në vend pushtetin e deleguar nga qytetarët, duke konstituuar Kuvendin e duke zgjedhur qeverinë e re”, ka shkruar Murati të premten.
Gjasat që opozita të ndryshojë qëndrim lidhur me votimin e kryekuvendarit nëse LVV nuk e ndërron kandidaten janë zero. Kreu i LDK-së, Lumir Abdixhiku, madje s’ka pranuar fare ftesën e dytë të Kurtit për takim konsultativ rreth konstituimit të Kuvendit.
Pritet të shihet nëse LVV do të synojë përsëri që të ndërrojë mënyrën e votimit në Kuvend apo nëse do ta ndryshojë kandidaturen për kryetare, meqë që nga 19 prilli kur deputetët janë betuar, kanë dështuar vazhdimisht të sigurojnë 61 vota.
Albin Kurti ka bërë përpjekje për të siguruar tri votat e Fatmir Limajt, megjithatë duket se pa një marrëveshje për bashkëpunim në qeveri, Limaj nuk do ta përkrahë Kurtin për konstituimin e Kuvendit. Edhe deputetja nga minoritetet jo-serbe, Duda Balje, ka treguar hapur se nuk do të bashkëpunojë me LVV-në dhe se është në diskutime për t’iu bashkuar AAK-së në Grup Parlamentar.
